RIPE NCC (Réseaux IP Européens Şəbəkə Koordinasiya Mərkəzi) Avropa, Yaxın Şərq və Mərkəzi Asiyanın bəzi hissələri üçün regional İnternet reyestridir (Regional Internet Registry). Onun baş ofisi Hollandiya, Amsterdamdadır və filialı Dubayda, BƏƏ-də yerləşir.
RIR müəyyən bir regionda İnternet nömrə resurslarının (IPv4 ünvanları, IPv6 ünvanları və avtonom sistem nömrələri) ayrılmasına və qeydiyyatına nəzarət edir.
RIPE NCC İnternet infrastrukturunun texniki və inzibati koordinasiyasını dəstəkləyir. Bu, xidmət bölgəsində 76-dan çox ölkədə yerləşən 10,000-dən çox (2014-cü ilin mart tarixinə) üzvü olan qeyri-kommersiya təşkilatıdır.
İstənilən şəxs və ya təşkilat RIPE NCC-nin üzvü ola bilər. Üzvlük əsasən İnternet xidmət provayderləri (ISP), telekommunikasiya təşkilatları, təhsil müəssisələri, hökumətlər, tənzimləyici agentliklər və böyük korporasiyalardan ibarətdir.
RIPE NCC həmçinin İnternetin texniki inkişafında maraqlı olan bütün tərəflər üçün açıq olan Réseaux IP Européens (RIPE) forumuna texniki və inzibati dəstək göstərir.